Povratak Mediteranu

Vijesti

Kultura, 09-06-2008

"Moja zamisao o Festivalu sa pravim mediteranskim zvukom i pjevanjem uživo se ostvarila-imaćemo Pjesmu Mediterana", rekao je umjetnički direktor Festivala Djelo Jusić.

Za Pjesmu Mediterana ove godine takmičiće se 32 pjesme iz Crne Gore, zemalja regiona, Madjarske, Izraela, Italije, Kipra, Grčke, San Marina.

Medju učesnicima su Tijana Dapčević, Jasna Gospić, Maja Odžaklijevska, Mićo Vujović, Kemal Monteno, Goran Karan, Kaliopi, Marijana Zlopaša, Franco Masi, Renata Perazić i drugi.

"Pošto smo dobili zaista veliki broj kvalitetnih kompozicija, možda će se u konkurenciji naći čak 36 numera", kaže izvršni direktor Festivala Aleksandar Armenko.

Jedna od novina Pjesme Mediterana je da će se cjelokupan program odvijati uživo, dakle pjevači će po prvi put morati pjevati uz pratnju velikog orkestra.

Prve dvije polufinalne večeri stručni žiri će odlučivati o finalistima, dok će se treće večeri pobjednik odlučiti u najvećem dijelu zahvaljujući glasovima publike i SMS porukama.

Podsjetimo, u revijalnom dijelu Festivala pjevaće svi dosadašnji pobjednici Festivala, druge večeri koncert će održati Julio Iglesias, dok će finalne večeri biti organizovana modna revija.

Ulaznice će koštati 10 do 15 EUR.

Iako je objavljen program Festivala, još nema konačne brojke o tome koliko će trodnevna manifestacija koštati.
Prema ranijim podacima, Opština Budva je sponzorisala Festival sa 90,000 EUR, što je, prema riječima Armenka, mali dio finansijske konstrukcije.

Na novinarsko pitanje da li je održan tender za dobijanje organizacije Pjesme Mediterana, Armenko je odgovorio negativno.

"Nije bilo tendera jer za umjetničko djelo postoji skraćena procedura", rekao je Armenko na press konferenciji.

Medijski sponzor Festivala ove godine je Atlas TV koja će signal prenijeti u još nekoliko država, a po prvi put će se Festival emitovati i putem Interneta.